Սիրելի բարեկամս.

Եթե չես տեսել երաժշտական կոմեդիայի թատրոնում բեմադրված ‹‹Մորգանի խնամին›› և մանավանդ Թաթիկ Սարյանի Մինթոևը, ասել է թե` թատրոն չես տեսել առհասարակ:

ՎԱՀՐԱՄ ՓԱՓԱԶՅԱՆ

Երաժշտական կոմեդիայի թատրոնն ունի ստեղծագործական այնպիսի ներուժ, որով կարելի է հրաշքներ գործել: ‹‹Կրկեսի իշխանուհին›› օպերետի բեմադրության վրա աշխատածս օրերը` կյանքիս ստեղծագործական ամենաերջանիկ պահերից են:

ԵՐՎԱՆԴ ՔՈՉԱՐ

Երաժշտական կոմեդիայի թատրոն... Կարո՞ղ ես գրել այս հրաշալի թատրոնի անունը և չհիշել նրա հիմնադիրներին` Շարա Տալյան, Արտեմի Այվազյան, Թաթիկ Սարյան, Արամ Տեր-Հովհաննիսյան, Իզաբելա և Հայկ Դանզասներ, Վարդան Աճեմյան, Արմենակ Տեր-Աբրահամյան, Էդուարդ Համբարձումյան, Կարպ Խաչվանքյան...

ԳՈՀԱՐ ԳԱՍՊԱՐՅԱՆ

Վարդան Աճեմյանի բեմադրած բարձրակարգ բեմադրությունները նոր շրջափուլ եղան երաժշտական կոմեդիայի թատրոնի պատմության մեջ` ուղենշելով նրա հետագա առաջընթացը:

ԼԵՎՈՆ ՀԱԽՎԵՐԴՅԱՆ

Ուրախ ժանրի այս թատրոնը ծնվեց ժամանակի հրամայականով` Հայրենական Մեծ պատերազմի ծանր օրերին, որպեսզի ‹‹ծիծաղի զենքով›› պայքարի անարգ թշնամու դեմ:

ԱՎԵՏԻՔ ԻՍԱՀԱԿՅԱՆ

Երևանի օպերային թատրոնը կարող է հպարտանալ տաղանդավոր իր դերասաններով և բարձրակարգ երաժիտներով: Հիացած եմ Տ. Չուխաջյանի ‹‹Կարինեի›› բարձրարվեստ ներկայացումով, խանարհվում եմ ստեղծագործական կազմին և համբուրում եմ իմ հին ու մեծատաղանդ բարեկան Արամ Տեր-Հովհաննիսյանին: ...Վարպետ: Հազար անգամ արժանի է կոչվելու:

ԱՐԱՄ ԽԱՉԱՏՐՅԱՆ

Ինձ հիացրեց Երևանի Երաժշտական Կոմեդիայի Պետական Թատրոնի ‹‹Ազատաշունչ հողմ›› օպերետի բեմադրությունը: Հրաշալի է ամեն ինչ` հատկապես Վարդան Աճեմյանի գունագեղ ռեժիսուրան և դերասանների խաղը: Նախանձում եմ հայ հանդիսատեսին, որ վայելում է իմաստությամբ լուսավորված արվեստ:

ԼՅՈՒԲՈՎ ՕՐԼՈՎԱ

ՄՈՍԿՎԱ

Գիտեի, որ հայկական օպերատային արվեսն ունեցել է հնագույն անցյալ, տեսա նախանձելի ներկան և համոզված եմ նրա հրաշալի ապագայով: ‹‹Տիկին մինիստրուհին›› ներկայացումն ու Սվետլանա Գրիգորյանի Ժիվկան, ոչնչով չեն զիջում նույն տիպի մոսկովյան բեմադրությանը: Բրավո, Երևանի օպերետային թատրոն...

ՍԵՐԳԵՅ ՄԱՐՏԻՆՍՈՆ

Երաժշտական կոմեդիայի թատրոնի առաջին իսկ ներկայացումից հասկանալի դարձավ, որ հյուրախաղերի է եկել թատերական վառ ձևերին, ռեժիսորական հնարքներին տիրապետող և դերասանական անհատականություններով հարուստ մայրաքաղաքային թատրոն, որից շատ բան ունեն սովորելու նույնատիպ թատրոնները:

ՎԱԽԹԱՆԳ ՉԱԲՈՒԿԻԱՆԻ

Երաժշտական կոմեդիայի թատրոնը մեր հանրապետության ամենասիրված թատրոններից մեկն է և ակնառու դեր է խաղում մեր թատերարվեստի պատմության մեջ: Սիրում եմ նրա ոգեշունչ արվեստը և բարձր եմ գնահատում նրա տաղանդավոր արտիսների նվիրվածությունը բեմին:

ՍԻԼՎԱ ԿԱՊՈՒՏԻԿՅԱՆ

Երևանի օպերետային թատրոնն աշխատել է միշտ ժպիտ ու ծիծաղ պարգևել մարդկանց և դա նրան հաջողվել է: Ծիծաղի թատրոն` սա է նրա ուղենիշը, որին թատրոնը հավատարիմ մնաց իր գոյության բոլոր տարիներին:

ՎԻԿՏՈՐ ՀԱՄԲԱՐՁՈՒՄՅԱՆ

Օպերետը միշտ եղել է ժողովրդական զանգվածների ամենամոտ թատերային ձևերից մեկը, միայն թե հարկավոր է մաքրել այն օտարամուտ տարրերից, տանել ճիշտ ճանապարհով:

ԱԼԵՔՍԱՆԴՐ ԼՈՒՆԱՉԱՐՍԿԻ

Երաժշտական կոմեդիայի թատրոնի բացումը Երևանում, մշակութային նշանակալից իրադարձություն լինելու հետ մեկտեղ, երևույթ է նաև հանրապետության հասարակական կյանքում:

ՌՈՒԲԵՆ ԶԱՐՅԱՆ